LAOAG CITY – Nakigtot ti maysa a kameng ti Sangguniang Panlungsod nga apaman a bimmisita iti Barangay Navotas South ditoy siudad ti Laoag iti baet ti kinabara ti panawen ket nabasa ti kalsada.
Segun iti Chairman ti Committee on Peace and Order, daytoy a paset ti nasao a barangay ket maysa nga housing project ti lokal a gobierno nga addaan ti 50 a pagtaengan a pagnanaedan ti sumurok-kumurang 200 nga indibidual.
Inbatadna a basar iti pannakisarsaritana kadagiti residente ket naduktalan a daytoy ket resulta iti kinaawan ti drainage system-da a rason no apay amin a water waste dagiti pagtaengan ket dumiretso iti kalsada.
Gapu iti daytoy, inpakaammona nga adda ti nabangsit nga angot a tumaod ti nasao a komunidad a narisgo iti salun-at dagiti tattao.
Inlawlawagna nga adun dagiti bimmista a kandidato kadakuada iti naglabas nga eleksion a nangipanamnama nga adda ti panagbalbaliw a mapasamak ngem agpapan ita ket awan pay.
Kunana a rumbeng a maipaay daytoy a basic necessity ti nasao a komunidad gapu ta no kastoy ti agtultuloy a mapasamak ket mangipasimudaag a binaybay-anen ti gobierno daytoy a proyekto.
Mainaig iti daytoy, nangipasa ti maysa a resolusion a mangkiddaw iti City Engineering Office a mangisubmitir ti masterplan a pakakitaan no kasano a maipatungpal ti infrastructure project iti drainage system ken kongkreto a kalsada.
Innayonna a rumbeng pay a maipasa iti Sangguniang Panlungsod no mano ti pakabuklan a balor tapno mabukel ti nasao a proyekto.
Nagpanawagan pay isuna iti 1st District Congressional Office a maipaayan ti pundo daytoy tapno matulongan ken maipaay nga insigida ti tulong a kasapulan ti nasao a komunidad.
