LAOAG CITY – Agtultuloy ti panagmonitor ti Person with Disability Affairs Office kadagiti nagduduma a pasdek negosyo ditoy ciudad ti Laoag tapno masigurado no ipapaay da met laeng dagiti serbisyo a rebbeng para kadagiti addaan ti rangkap ti bagi.
Daytoy ti inbatad ni Mr. Christoper King Medina, Disability Affairs Officer 4 iti Person with Disability Affairs Office ditoy ciudad ti Laoag.
Kunana nga adda latta dagiti madukduktalan da a saan a sumursurot iti paglintegan kas iti panangipaay ti 20% a diskwento, pannakaestablisar ti priority lane, pagparkingan ken pagnaan dagiti adda rangkap ti bagina.
Inbatad na a no adda dagiti maduktalan da nga establisimiento a saan a sumursurot kadagiti pagannurutan para kadagiti addaan ti rangkap ti bagi ket insigida a kasarita da dagitoy.
Segun kenkuana, ilawlawag da a kasapulan a maited dagitoy gapo ta saan a kiniddaw dagitoy dagiti Person with Disability no di ket inted ti gobierno dagitoy a pribilehiyo.
