LAOAG CITY – Balligi ti naiyuswat a search operation kontra iti maysa a drug surrenderee iti ili ti Dingras.
Binigbig ni Police Major Norman Pentang, ti chief of police iti ili ti Dingras, ti subject ti operasyon a ni Mahnoel Ofilas Revilla, agtawen ti 43, naasawaan, drug surrenderee ken residente iti Brgy. Medina iti nadakamat nga ili.
Inbatad ni Pentang nga awan iti balayda ti subject kabayatan ti pannakaipatungpal ti search operation gapu iti panagsalungasing ti Republic Act 10591 wenno Comprehensive Firearms and Ammunition Regulation Act no sadinno a ti search warrant ket inparuk-at ni Hon. Dinah Myrtle M Paquing, Executive Judge, iti Branch 11 ditoy ciudad ti Laoag.
Inlawlawag ni Pentang a kaduada ti Provincial Intelligence Unit (PIU), ken 2nd Provincial Mobile Force Company a nangipatungpal ti search operation iti pagtaengan Revilla ken nakakumpiskar da ti maysa nga unit ti caliber .38 revolver, nagduduma a bala, ken mapapati nga illegal a droga.
Kuna na a naimatangan ti kabsat ti subject, barangay officials ti nasao nga operasyon.
Mainaig iti daytoy imbatad ni Pentang a maipila ti kaso criminal kas regular filling kontra iti suspect.
Naamoan a ti nasao a suspek ket addan ti dati a kaso na a daytoy ket panagsalungasing iti Republic Act 9165 wenno Comprehensive Dangerous Drugs Act of 2002.
