LAOAG CITY – Nakoronaan kas Miss Ilocos Norte 2025 ni Miss Jamaica Nicole Mamuad manipod iti ili ti Dingras kabayatan ti coronation night iti Ilocos Norte Centennial Arena idi rabii.
Ti newly crowned Ilokana queen ket agtawen ti 19 ken mangal-ala iti kurso a Bachelor of Science in Nursing iti Northwestern University.
Malaksid iti “Blue crown” a majestic symbol ti probinsya a naipaay iti baro a Miss Ilocos Norte, nakaawat pay daytoy ti prize, trophy, sash, ken ti scholarship grant.
Nagun-od met ni Miss Pagudpud ti 1st Runner Up; 2nd Runner Up ni Miss San Nicolas, idinto a 3rd runner up ni Miss Bangui ken 4th runner up ni Miss Dumalneg.
Ita a tawen, dagiti panel of judges ket binukel dagiti natan-ok nga indibidual manipud iti nagduduma a fields of expertise.
Maymaysa laeng ti nagbalin a saludsud kadagiti Top 5, daytoy ket ti “If you were to speak to a first-timer in Ilocos Norte, what local sustainable efforts would you share with them?” no sadinno a ti nagbalin a sungbat ni Miss Dingras ket “In Ilocos Norte, sustainability is not just a choice, it is our heritage. We honor the land our ancestors protected by protecting it too, celebrating it, and preserving it”.
Indauluan ti selection committee ni Gabriel, kaduana ni Miss International 2013 Bea Rose Santiago, nangabak iti Rupaul’s Drag Race Philippines Season 3 Maxie Andreison, ti atleta ken aktor a ni John Vic De Guzman, Bb. Pilipinas Ilocos Norte 2001 Mary Jane Leaño, Miss Ilocos Norte 2014 Czarina Adina, ken optometrist and entrepreneur Elaine Cua-Reyes.
Tinawen a maiyus-uswat ti Miss Ilocos Norte no sadinno a dagiti mangibagi iti nagduduma a municipalidad ken ciudad ket ipakita da ti lokal a kultura ken tawid ti Ilocos Norte, bayat ti panangselebrar iti kinapintas, talento, ken kinasaririt dagiti moderno nga Ilokana.
