LAOAG CITY – Inbilin ni Presidente Ferdinand Marcos Jr. iti Department of Information and Communications Technology ken Commission on Elections a mangbukel ti 24/7 threat monitoring center tapno maipasigurado ti nadalus ken nakappia nga eleksion inton bigat, aldaw ti Lunes, Mayo 12, 2025.
Daytoy ti kaunaan a 24/7 Threat Monitoring Center nga addaan ti real time digital command post.
Segun ken ni Palace Press Officer USec. Claire Castro, gagem ti nasao a monitoring center a duktalen, lappedan ken lippasen ti online misinformation and disinformation.
Daytoy ket idauloan ti Cybercrime Investigation and Coordinating Center ti Department of Information and Communications Technology ken ti Task Force Katotohanan, Katapatan at Katarungan inton eleksion wenno ti Task Force KKK.
Inbatad ni Castro a ti nasao nga addang ket pammaneknek a napaspas nga agtignay ti gobierno ken agkaykaysa ti gobierno no ti kinapudno ti mapagsasaritaan.
