LAOAG CITY – Inpakaammo ti City Planning and Development Office ditoy ciudad ti Laoag a makikoordinar ti lokal a gobierno iti ili ti San Nicolas tapno maliklikan ti nairot a trapiko iti Gilbert Bridge.
Segun kenni Ms. Ruby Bunalade, ti mangidadaulo iti nadakamat nga opisina, ti nasao nga addang ket paset ti panagsakbay iti possible a naan-anay a pannakaimplementar dagiti traffic lights.
Inbatad na a masapol a makontrol dagiti behikulo iti paylaeng ili ti San Nicolas sakbay da a dumanon iti junction nga ayan ti umuna a traffic lights tapno adda metlaeng ti serbina.
Kunana a possible a maurnongan ti lugan iti junction no saan a makontrol iti ili ti San Nicolas isut gapuna a masapol ti sinkronisado a pannakamanihir ti trapiko aglalo ket dandanin ti panaglukat ti mall ditoy ciudad.
Innayon na a kasapulan ti naan-anay a koordinasion ti siudad ti Laoag ken iti ili ti San Nicolas para iti pagsayaatan dagiti motorista nga isu ti kalikagumda a maurnos.
Kabayatanna, nagtalinaed a dua paylaeng dagiti nakainstolar a traffic lights ken saan pay a fully operational, no sadinno a makita ti maysa iti Rizal St. dayaen ti kapitolyo probinsiak ken iti junction, ken manamnama a sumaruno met a mainstolaran iti paset ti General Segundo Avenue.
