LAOAG CITY – Agtultuloy ti panagngato ti mapaspastrek ti Laoag City General Hospital gapu iti kinaadu dagiti pasiente ken maipapaay a serbisio.
Segun kenni Dr. Marsha Lou Wapan, mangidadaulo ti Laoag City General Hospital, umabot iti 13-milyon a pisos ti napastrek da iti umuna nga uppat a bulan idi 2024 idinto nga iti isu metlaeng a kapada na a panawen ita a 2025 ket umaboten iti nasurok a 16-milyon a pisos.
Namnamaen ni Wapan a dakdakkel pay ti mapastrek ti Laog City General Hospital ita a tawen.
Inbatad na ni Dr. Wapan a nabayadanen ti agdama nga administration ti utangna a nausar iti pannakatarimaan ti ospital, pinagbayad ti nagduduma a serbisyo, sweldo dagiti empleado ken dadduma pay.
Kunana a makita a dakkelen ti nagbaliwan iti serbiso iti nasao nga ospital kas kuma iti pannakapabaro dagiti pasilidad, medical equipment, agas ken iti on time a pannakaawaten dagiti empleado ti sweldo ken benepisio da.
Inpakaammo na a nanayunan payen ti bilang dagiti medical personnel kangrunaanan dagiti doktor nga agpapaay iti nadakamat nga ospital.
