LAOAG CITY – Simmangpeten ditoy Ilocos Norte ti sumurok 1,100 nga atleta manipud iti nagduduma a paset ti pagilian, eksakto maysa a lawas sakbay ti 2025 Palarong Pambansa.
Segun ken ni Mrs. Helen Rose Domingo, mangidadaulo ti Provincial Sports and Development Office, ti nasao a bilang dagiti umaayam a simmangpet iti Laoag International Airport ket manipud iti Visayas ken Mindanao.
Inbatadna nga adda ti naisayangkat a Final Technical Conference idi Mayo 1 agingga iti Mayo 3 no sadinno nga amin a Technical Directors ket inkarigatanda nga inlippas ken inyurnos dagiti nagbalin a problema kadagiti sporting venues.
Inlawlawagna a nakasaganan dagiti billeting centers para kadagiti amin nga atleta kadagiti nagduduma a tay-ak ti ay-ayam.
Kunana a manamnama a dumanon iti agarup 1,700 nga athletes, coaches, manursuro manipud kadagiti nagduduma nga Schools Division Office iti intero a pagilian ken dagiti Department of Education officials and personnel ti makipaset iti naindaklan ken naisangsangayan nga aktibidad.
Naammoan a mangrugi inton Mayo 24 agingga iti Hunio 2, 2025 ti Palarong Pambansa nga host ti probinsia ti Ilocos Norte ita a tawen.
Kabayatanna, ti Palarong Pambansa ket maibilang a kadakkelan a multi-sport event ditoy Pilipinas a maisaysayangkat iti kada tawen a pakipasetan dagiti student athletes iti intero a pagilian.
