LAOAG CITY – Nagpanawagan ni P/Col. Frederick Obar, Provincial Director ti Ilocos Norte Police Provincial Office kadagiti pasdek negosio ken Public Utility Vehicles a makikooperarda para iti umas-asidegen a 2025 Palarong Pambansa.
Segun kenkuana, daytoy ket kalpasan nga adda ti nagbalin nga isyu kadagiti naglabas a tawen a maipagarup a panag-overpricing wenno nalabes unay a panagsingir dagiti store owners ken dagiti driver ti Public Utility Vehicles kadagiti maseknan nga atleta.
Gapu iti daytoy, naminsan manen nga inpalagip ni P/Col. Obar maipanggep iti daytoy a banag tapno saanen a maulit ti napasamak a pakaibabainan ti intero a probinsia.
Ginutigotna dagiti amin nga umili nga agbalin a nasayaat kadagiti bisita tapno awan ti negatibo wenno dakes a maibagada kabayatan ti kaaddada ditoy probinsia.
Innayonna ti panangipasingkedna ti pannakaipaay ti naan-anay a seguridad para kadagiti amin a makipaset iti naisangsangayan a Palarong Pambansa no sadinno nga host ti probinsia ita a tawen.
