LAOAG CITY – Nakasaganan ti Commission on Elections iti ili ti Sarrat ti pannakaisayangkat ti voter registration para iti Barangay and Sangguniang Kabataan Elections 2025.
Segun ken ni Mr. Robert Fernandez, mangidadaulo ti Commission on Elections iti ili ti Sarrat, naikeddeng a mangrugi ti panangawatda kadagiti agparehistro nga agbutos inton bulan ti Hulio.
Inbatadna a nakasaganan dagiti kasapulanda iti pangopisinaanda gapu ta dagiti gagangay a dokumento ti maaramat iti daytoy.
Inlawlawagna a dagiti kualipikasion tapno makaparehistro ket nasken a Filipino Citizen, agtawen ti 18 inton wenno sakbay iti aldaw ti eleksion, residente ditoy Pilipinas iti saan a nababbaba ngem maysa a tawen, residente iti barangay a pagbutosan iti saan a nababbaba ngem innem a bulan sakbay ti eleksion.
Namnamaenna a dagiti residente iti nasao nga ili a kualipikado nga agbutos ket agturongda laeng iti opisinada manipud Hulio 1 agingga inton Hulio 11.
Maipalagip nga immun-unan nga inpakaammo ti Commission on Elections a ti naikeddeng a petsa ti pannakaisayangkat ti Barangay and Sangguniang Kabataan Elections 2025 ket inton Disiembre 1.
