LAOAG CITY – Mangisayangkat ti gobierno lokal babaen iti Public Employment Service Office iti job fair kas paset ti selebrasyon iti charter day ditoy ciudad ti Laoag.
Ti nasao a job fair ket maiyuswat intono Hunyo 27 iti mall ditoy ciudad ti Laoag ken kabinnulig ti gobierno lokal ti Department of Labor and Employment.
Segun ken ni Miss Shey Pia Abaya, ti mangidadaulo iti Public Employment Service Office ditoy ciudad, addan ti 28 a kompanya a nagsign-up, ken ti iyur-uray da iti agdama ket ti agbalin a sungbat ti Department of Migrant Workers para iti overseas employment.
Inpakaammo ni Abaya a karaman kadagiti manamnama a maidiaya a trabaho ket ti call center agents, sales assistants, cashiers, baggers, ken dadduma pay.
Innayon na a target da ti maka-hire iti 500 agingga iti 800 nga aplikante gapu ta ado a kompanya dagiti makipaset iti maisayangkat a job fair.
Inbalakad ni Abaya kadagiti job seekers wenno dagiti mapan manggundaway iti job fair nga agitugot iti ado a resume tapno saan laeng a maymaysa a kompanya ti pagisumitiran da tapno dakdakkel ti gundaway da a makastrek iti trabaho.
Kabayatanna, kuna na a plano da pay ti mangipatungpal iti One Stop Shop no sadinno a ti paylaeng nangkumpirmar a makipaset ket ti Philippine Health Insurance Corporation, ngem iyur-uray na ti kumpirmasyon ti Social Security System, National Bureau of Investigation ken dadduma pay.
