LAOAG CITY – Kwinestyunaran ni Konsehal RJ Farñias no apay a saan pay a naited iti medical allowance dagiti empleado iti lokal a gobierno ditoy ciudad ti Laoag.
Inbatadna a naipasa pay laeng daytoy idi Marso 25 ita a tawen ken agdagop daytoy iti agarup 6-milyon a pisos.
Kunana a masapol nga amwen ti Local Finance Committee wenno aniaman a maseknan a departamento tapno maamoan ti status daytoy.
Innayon na a rumbeng nga amwen pay no kaanu ti schedule ti pannakaipaay ti medical allowance dagiti empleado ti gobierno lokal ditoy ciudad.
Maipalagip a daytoy nga inisyatiba ket naaprobaran iti babaen ti Executive Order No. 64 nga adda ti pirma ni Presidente Ferdinand Marcos Jr. no sadinno a makaawat dagiti agpapaay ti gobierno ti P7,000 medical allowance iti kada tawen tapno matulungan dagitoy a makaala kadagiti benepisio manipud iti Health Maintenance Organization (HMO).
