LAOAG CITY – Natay ti nakamotorsiklo kalpasan ti panagdinnungparda ti Utility closed Van iti Barangay 23 iti ili ti San Nicolas.
Nabigbig ti biktima a nangiturong ti Yamaha Nmax nga agmaris ti nangisit a ni Lawrence Valenzuela, agtawen ti 28 ken residente ti Barangay Escoda iti ili ti Marcos idinto a ti driver ti Utility closed Van ket ni Eddiemar Miguel, agtawen ti 31, naasawaan, construction worker ken residente ti Barangay 5 Puttao iti ili ti Solsona.
Basar iti San Nicolas Municipal Police Station, kabayatan a dumaldalyasat ti nakamotorsiklo nga agturong nga agpa-abagatan ket kellaat daytoy a dinungpar ti Utility closed Van nga agturong met nga agpa-amianan.
Iti imbestigasion dagiti otoridad, napukawan ti kontrol ti manibela ti driver ti Utility closed Van rason a napan iti sabali a linya ti kalsada a nangitunda ti panagdinnungparda iti motorsiklo.
Gapu iti daytoy, nagsagaba ti nakana a sugat iti nagduduma a paset ti bagi ti driver ti motorsiklo a naitaray iti Mariano Marcos Memorial Hospital and Medical Center iti siudad ti Batac ngem pimmusay kabayatan a matamtaming idinto a nasugatan iti luppo ti driver ti Utility closed Van ken dagiti kakaduana a nakalugan.
Mainaig iti daytoy, naminpinsan a nadadael ti motorsiklo gapu iti kinapigsa ti impact ti desgrasia idinto a nadadael ti wind shield ken headlight ti Utility closed Van.
Naammoan a nakasuot ti helmet ti biktima idi napasamak ti desgrasia ngem naikkat daytoy kalpasan a naipurwak iti kalsada.
Kabayatanna, ti biktima ket agawid koman iti ili ti Marcos idinto a dagiti nakalugan a construction workers iti Utility closed Van ket mapan agtrabaho iti Barangay San Pablo iti ili ti San Nicolas.
