LAOAG CITY – Inpetteng ti Presidente ti Brazil a ni Luiz Inacio Lula da Silva a nasken nga agtignay ti intero a lubong tapno lappedan ti “genocide” ti Israel idiay Gaza kabayatan ti panagtataripnong dagiti lider manipud kadagiti 11 a pagilian a miembro ti BRICS wenno Brazil, Russia, India, China ken South Africa idiay Rio de Janeiro.
Inbatadna ti sangoanan dagiti lider manipud kadagiti nasao a pagilian a saan a mabalin nga awan ti aramidenda iti genocide nga iwaywayat ti Israel idiay Gaza no sadinno nga awan ti pilpilienda iti panangpapatay kadagiti inosente a sibilian ken panagusar ti panagbisin kas armas iti riribuk.
Inrakurak ni Lula dagitoy a komentona kagiddan a nangrugin ti panagsasarita maipanggep iti tigil-putukan iti Doha iti nagbaetan ti Israel ken Hamas iti baet ti umig-iget a panawagan a lippasenen ti agarup dua a tawenen a gubat a nangrugi kalpasan ti panangatake ti Hamas idi Oktubre 7, 2023.
Kabayatanna, naiget a kinondenarna dagiti saan a nainkalintegan nga ar-aramiden ti Israel.
