LAOAG CITY – Inpakaammo ni Police Capt. Joseph Calderon, ti chief of police iti ili ti Bacarra nga adda ti mangus-usar ti nagan na tapno agsolicit.
Inlawlawag na nga idi biernes agarop alas-tres ti malem ket timmawag kenkuana ni Doctor Ian Sotto iti Rural Health Unit iti ili ti Bacarra tapno damagen no adda ti us-usaren na a sabali a numero.
Kagiddan iti daytoy, naibaga ni Doctor Sotto nga adda ti timmawag kenkuana a nagpammarang a ni Calderon no sadinno nga agkidkiddaw ti contacts dagiti pharmacy ken agsolsolicit pay.
Inpasigurado met ni Calderon a sabali a tao ti timmawag iti doktor gapu ta maymaysa laeng ti us-usaren na a numero ken ammo daytoy ni Doctor Sotto.
Malaksid ken ni Doctor Sotto, adda pay ti timmawag pay iti Police Station ngem sabali a numero a nagpabigbig a ni Calderon.
Nupay kasta, kuna ti chief of police a saan nga inkaso dagiti kakadwana gapu ta iti dayta a gundaway ket adda isuna iti mismo a police station ken nalawag a ti timmawag ket scammer.
Inpakaammo ni Calderon nga apaman a naduktalan na nga adda dagiti mangus-usar ti nagan na tapno agsolicit ket nagmessage a dagus iti amin a kakapitan iti ili ti Bacarra babaen iti group chat da, kadwa da ditoy ti mayor ken bise mayor tapno ipakaammo daytoy a banag.
Uray kadagiti nagduduma nga opisina iti lokal a gobierno iti ili ti Bacarra ket pinakaammoan na tapno ammo da ti ar-aramiden da no bilang makaawat da met ti mensahe wenno tawag nga agpammarang nga isuna.
Kabayatanna, nagpanawagan ni Calderon iti publiko a no adda ti maaw-awat da a mensahe wenno tawag nga agpabigbig nga isuna tapno agsolicit ket ireport da a dagus iti Police Station tapno saan a mabiktima dagitoy.
