LAOAG CITY – Umabot iti 12 a tattao ti natay iti napasamak a nalawa nga uram iti Turkey ken Cyprus, karaman ditoy ti 10 a bombero ken dua a sibilyan iti baet ti mapaspasaran a nakaro nga heatwave iti Mediterranean.
Segun iti Turkish authorities, innem a nagsisina nga uram ti sinebseban dagiti bombero partikular iti tallo a probinsya idiay Turkey.
Narigatan dagiti bombero a nangsebseb ti apoy gapu iti napipigsa nga angin ken nakaro a kinabara ti panawen a nangpakaro ti sitwasyon.
Nasurok a 14 a bombero ti nasugatan idinto a rinibo a residente ti nabakwit.
Kabayatanna, iti Cyprus ket dua met nga indibidual ti nabirukan a natay iti uneg ti lugan da kalpasan a napupuk da iti kabanbantayan ti Limassol.
Mapatta-patta nga aglawa ti 124 square kilometers iti kabanbantayan ti nauram.
Nangipatulod met a dagus ti tulong ti sumagmamano a pagilyan kas ti Jordan, Egypt, Spain, Greece, ken Israel.
