LAOAG CITY – Gutgutigoten ti City Environment and Natural Resources Office ditoy siudad ti Laoag dagiti umili nga agmula nangruna ita a panawen ti panagtutudo.
Segun ken ni Ms. Mylene Pascual, mangidadaulo iti nasao nga opisina, mabalin ti agkiddaw ti opisinada kadagiti maimula.
Inlawlawagna a maliklikan ti panaglayos wenno panagregaay ti daga no adu dagiti kayo a naimula iti aglawlaw.
Inbatadna nga iti opisinada ket adda dagiti nagduduma a mula a mabalin a dawaten kas ti narra, bamboo ken dagiti dadduma pay a forest trees.
Kunana a masapul met a saan laeng nga agpatingga iti panagmula no diket kasapulan ti naan-anay a pannakatagiben.
Innayonna nga adu metten dagiti napan nagkiddaw iti opisinada nangruna kadagiti Non-Government Organizations ken sumagmamano a barangay.
