LAOAG CITY – Inpakammo ni Atty. Charito Malicad, mangidadaulo ti City Tourism Office ditoy suidad ti Laoag a plano ti opisina ti naan-anay a pannaka-develop ti Laoag Sand dunes.
Segun kenkuana, inpresentar na dagiti plano da nga aramiden iti sand dunes iti presidente iti nasao a lugar ken akinkua iti lote a sakupen iti sand dunes.
Inbatad na a napagsasaritaan da no ania pay dagiti mabalin nga aramiden tapno ad-adda a maay-ayo, maallukoy ken agenjoy dagiti turista nga agturong iti nasao a lugar.
Kuna ni Malicad a karaman ti tourism development plan iti opisina da iti pannakaiplastar iti Sand dunes kas iti pannakaikabil iti structure kadagiti 3 nga station wenno pagsardengan dagiti nakalugan iti 4by4 tapno ad-adda pay a maaprisyar da ti kinapintas iti lugar .
Malaksid iti daytoy, plano da pay ti mangikabil iti paggatangan dagiti makan, pagtutugawan ken dadduma pay iti masungad a paset iti sand dunes wenno iti abay ti parking area.
Innayon ni Malicad a babaen kadagitoy a plano da ket saan laeng a pumatok kadagiti turista no diket ngumato pay ti mapastrekan dagiti operators.
