LAOAG CITY – Inkalintegan ni Senador Imee Marcos nga awan ti inbabana ti kinatao na kalpasan nga inrekomendar na kadagiti kongresista a sukatan da ni House Speaker Martin Romualdez imbes nga ilungalong da ti pannaka-impeach ni Vice President Sara Duterte.
Iti maysa a press conference, inbatad ni Sen. Imee Marcos a suhestyon na laeng daytoy ken saanna nga ipilit.
Inlawlawag pay ti Senadora a naibaga na ti nagbalin a suhestiyon na kadagiti kongresista gapu iti panangpuntirya da iti siasinno man a kabaelan da nga i-impeach ken inpetteng na a nasaysayaat no saanen a pakibiangan ti binotosan ti kaadoan a Pilipino.
Maipalagip nga inrekomendar ni Sen. Marcos ti panangsukat ti agdama nga Speaker ti Kamara de Representantes kagiddan ti panagbotos na pabor para iti pannakai-archive ti articles of impeachment kontra ken ni Vice President Sara Duterte iti Senado idi Miyerkules, Agosto 6.
Sumagmamano met nga House leaders ti nangdillar iti nagbalin a suhestiyon ti Senadora.
Karaman ditoy ni House Deputy Speaker David Suarez a nangipetteng nga awan ti siasinno man a senador nga addaan ti karbengan a mangdikta no siasinno ti mangidaulo iti kababaan a pagpandayan linteg iti kongreso.
