LAOAG CITY – Agtultuloy a maiwaywayat ti search and rescue operation iti mapukpukaw a senior citizen iti Padsan River iti ili ti Banna.
Segun ken ni P/Maj. Exiquiel Giovanni Doloroso, Hepe ti Banna Municipal Police Station, nabigbig ti mapukpukaw a ni Alejandro Gaba, agtawen ti 62, naasawaan ken residente ti Barangay 2, Hilario iti nasao nga ili.
Inbatadna a basar iti pannakisarsaritada iti anak ti senior citizen ket agarup 4:30 ti malem idi Agosto 6, ti ama ken kabsatna ket napanda inyakar ti tarakenda a baka gapu iti napigsa a tudo.
Nupay kasta, kunana nga agarup 6:00 ti rabii iti kapada a petsa ket saan pay a nagsubli ti nasao a senior citizen rason a biniruk daytoy ti pamiliana ngem napaay dagitoy.
Inlawlawagna a naudi a nakita ti senior citizen a nakasuot ti nangisit a jacket ken short pants, agtayag ti 5’1” ken agdagsen ti 67 kilograms.
Innayonna a nangiwayat ti search and rescue operation ti Municipal Disaster Risk Reduction and Management Office iti ili ti Banna, Banna Municipal Police Station, Philippine National Police – Special Action Force, 2nd Provincial Mobile Force Company, Philippine Marines ken Bureau of Fire Protection.
