LAOAG CITY – Balligi a naisayangkat ti Simulation Exercise iti 5-minute response time babaen ti Piddig Municipal Police Station iti Barangay Tonoton iti ili ti Piddig.
Segun ken ni P/Maj. Kristian Lee Badua, Hepe ti Piddig Municipal Police Station, daytoy nga aktibidad ket wagas a panangtingiting no kabaelan ti nasao a kuerpo ti pulisia ti panagresponde dagitoy iti uneg ti lima a minuto.
Inbatadna a ti nasao nga aktibidad ket naiyuswat babaen ti pannakibinnulig ti lokal a gobierno iti ili ti Piddig.
Inlawlawagna a malaksid iti Philippine National Police ket kalikagum pay nga adaptaren daytoy ti Bureau of Fire Protection ken Municipal Disaster Risk Reduction and Management Office.
Mainaig iti daytoy, inpakaammo ni P/Maj. Badua nga adda ti maysa a concerned citizen a nagpammarang nga agkiddaw ti tulong iti Piddig Municipal Police Station gapu ta nadesgrasia daytoy.
Inpannakkelna a kinabaelan ti Philippine National Police iti panangresponde iti napasamak iti las-ud laeng ti uppat a minuto kaduana ti Bureau of Fire Protection ken Municipal Disaster Risk Reduction and Management Office.
Naammoan a ti nasao nga exercise ket saan a naipakpakaammo kadagiti personnel ti nailian a pulisia.
Innayonna nga agtultuloy ti ar-aramiden ti Piddig Municipal Police Station tapno al-alisto pay ti panangrespode dagitoy kas ti pannakai-deploy kadagiti kapulisan kadagiti protect box ken pannakaiwayat ti panagpatrolya dagitoy.
Immuna iti daytoy, inbilin ni Philippine National Police Chief Police General Nicolas Torre III ti naiget a pannakaipatungpal ti 5-minute response time kadagiti amin a pulis iti intero a pagilian.
