LAOAG CITY – Balligi a naarestar ti maysa a Registered Criminologist iti Anti-Illegal Drug Buy-bust Operation iti Barangay Caray iti ili ti Nueva Era.
Segun ken ni P/Capt. William Sotelo, Hepe ti Nueva Era Municipal Police Station, ti suspek ket agtawen ti 36, naasawaan, mannalon ken residente iti nasao a barangay.
Inbatadna a natiliw ti suspek kalpasan a naglako ti maysa nga heat sealed transparent plastic sachet a naglaon ti maipagarup a shabu iti maysa a police-poseur buyer.
Malaksid iti daytoy, naala pay manipud iti suspek ti pito nga heat sealed transparent plastic sachet a naglaon ti maatap a shabu.
Kunana a dagiti nakumpiskar nga iligal a droga ket agdagsen ti maysa a gramo ken agbalor ti 6,800 a pisos.
Inlawlawagna a ti suspek ket drug surrenderee ken maibilang nga Street Level Individual.
Naammoan a naarestar ti suspek iti mismo a pagtaenganna.
Mainaig iti daytoy, kuna ni P/Capt. Sotelo nga adda ti pakainaigan ti suspek kadagiti immun-unan a natiliw gapu met laeng iti iligal a droga.
Innayonna nga iti ili ti Badoc ti itudtudo ti suspek a pangal-alaanna ti droga.
