LAOAG CITY – Umaboten iti 48 ti kaso ti dengue ditoy ciudad ti Laoag agingga idi Hunyo 30 ita a tawen.
Daytoy ti inpakaammo ni Dr. Rodrigo Catcatan, ti mangidadaulo ti City Health Office ditoy ciudad.
Segun kenkuana, manipod iti nasao a bilang ket awan ti nairekord a severe no di ket agpapada laeng a mild ti sintomas dagiti pasyente, ken awan ti pimmusay.
Inbatad na nga agtultuloy iti panangiyuswat da iti fumigation kadagiti nagduduma a barangay kangrunaan dagiti pampubliko a pagalan ditoy ciudad wenno kadagiti daycare center.
Malaksid iti daytoy, kuna ni Catcatan a no agkiddaw met dagiti pribado a pagadalan iti panag-fumigate kadagitoy ket nakasagana da latta a mangipatungpal aglalo no adda iti kaso ti dengue iti maysa a lugar.
Mainaig iti daytoy, kunana a maysa kadagiti rason no apay nga umado manen ti kaso ti dengue ket gapo iti panagtudtudo na no sadinno ket ado dagiti mabalin a pagitlogan ti lamok a possible a carrier iti nasao a sakit.
Kabayatanna, nagballaag manen ni Dr. Catcatan iti publiko a pagtalinaeden a nadalos iti aglawlaw ken suruten dagiti dadduma pay nga addang a panangliklik iti nasao a sakit.
