LAOAG CITY – Saan a makibiang ti Malakanyang iti isyu dagiti dua a pagpandayan linteg iti Kongreso partikular iti anomaly a flood control projects.
Segun kenni Executive Secretary Lucas Bersamin, trabaho ti Senado ken Kamara a trataren ti alegasyon nangruna ket dagiti pay laeng “resource persons” ti nagsarita kadagiti panagdengeg.
Inbatad na a natural nga adda ti panagamak na kadagiti report mainaig iti ghost projects ken kadagiti nasayang a flood control funds.
Iti baet ti maipagarop a kurapsyon iti flood control projects a pakairamramanan dagiti sumagmamano nga ahensya ti gobyerno, kinumpirmaran ni Bersamin a natibker latta ti gobierno ken awan ti makitkita na a pangta.
Ummunan nga inbutaktak ni Finance Secretary Ralph Recto nga umabot iti P118.5 bilyon ti napukaw iti ekonomiya ti pagilyan sipud 2023 agingga iti 2025 gapo iti ghost flood control projects.
Kadagupan daytoy iti saan a bumaba iti 95,000 agingga iti 266,000 a trabaho a nabenipisyaran kuma dagiti Pilipino a kangrunaan nga agkasapulan.
Nagballaag pay ni Presidente Ferdinand “Bongbong” Marcos Jr. kontra kadagiti karaman iti kwestyunable a flood control projects ti gobierno.
