LAOAG CITY – Inkari ti baro a lider ti Nepal a suruten na ti kayat dagiti protesters tapno agpatinggan ti korapsyon iti nadakamat a pagilian.
Inrakurak daytoy ni Interim Prime Minister Sushila Karki iti pormal a panangrugi ti trabaho na kalpasan a pinadis dagiti agtutubo a demonstrador wenno ti maaw-awagan ti Gen Z ni Prime Minister K.P. Sharma Oli.
Nabilin ni Karki, agtawen ti 73 ken dati a chief justice nga isubli na ti linak, urnus ken talna iti Nepal, ken solusyunan na ti kalikagom dagiti protesters kangrunaan na ti pannakapagbalin ti pagilian kas corruption-free sakbay ti eleksyon a maipatungpal kalpasan ti innem a bolan.
Maipalagip a rimsua ti nadara ken nalawa a tignay protesta iti Nepal kalpasan a nai-ban ti social media no sadinno a gapu iti nakaro a pungtot dagiti protesters ket pinuuran da ti parliamento ken dagiti kangrunaan a pasdek ti gobierno.
Umabot met iti 72 a tattao ti natay iti dua nga aldaw laeng a tignay protesta ken 191 a sabsabali dagiti nasugatan.
