LAOAG CITY – Kasapulan ti City Social Welfare and Development ti tulong ti gobierno probinsyal tapno masolbar ti problema maipanggep kadagiti bajdao nga agwarang-warang ditoy ciudad ti Laoag.
Daytoy ti inbatad ni Mrs.Perlito Cabello, ti mangidadaulo iti City Social Welfare and Development ditoy ciudad.
Kuna na a saan a makaumanay ti pwersa da a mangsita kadagiti badjao nga agpalpalama ditoy ciudad ti Laoag, aglalo ket adda dagiti natangsit ken makiriri no saan da a makadawat ti kwarta.
Inpalgak na a namin-adon a daras a pinagsubli da dagiti badjao iti pagnanaedan da iti ili ti Badoc ken isuda payen ti nangibaklay ti pagplete da ngem agsubli latta dagitoy.
Innayon na a nasaysayaat no adda ti agbalin a mandar ni Governor Cecilia Araneta-Marcos a mangipawil kadagiti badjao nga agwarang-warang sakbay nga agbalin a dakkel a problema daytoy iti intero a probinsya, aglalo ket umad-adon dagiti ili a pagturturungan da.
Maipalagip a kadagiti naglabas a tawen ket ditoy laeng ciudad ti Laoag ken ili ti San Nicolas ket pagwarang-warangan dagiti badjao, ngem ita ket dumanon da payen agingga iti ili ti Banna, Dingras, Solsona ken dadduma pay.
