LAOAG CITY – Patien ni Ms. Perlita Cabello iti City Social Welfare and Development Office a dakkel ti papel ti pamilya ken komunidad tapno saan nga agsubli dagiti ubbing iti madi nga aramid manipod iti bahay pag-asa.
Kuna ni Cabello nga ibilang na a makaimpluwensya ti aglawlaw iti kababalin dagiti ubbing.
Inlawlawag na a saan da a kontrolado ti panunot ti maysa a tao ngem no napintas ti pannakatratar dagiti ubbing iti uneg ti pamilya ken no maakseptar da iti napasamak kadakuada ket dakkel ti tsansa nga agsubli ti talek dagiti ubbing kadakuada.
Kunana nga adda dagiti kliyente da a natulnog iti uneg ti center, napintas ti performance dagitoy, ken awan dagiti nalabsing da a pagannurutan, ngem nu makaruar dagitoy ket agsubli da iti madi nga aramid.
Inbatad na a daytoy ti rason nga adda ti responsibilidad ti pamilya ken komunidad nu makaruar dagitoy iti bahay pag-asa tapno saan a kailala dagiti programa a dimmalan dagitoy.
Daytoy ti nagbalin a sumbat ni Cabello kalpasan nga addan dagiti ummunan a report nga agsubsubli dagiti ubbing iti dati da nga aramid uray kagapgapu da laeng iti bahay pag-asa wenno iti rehab center.
Kunana nga adda ti monitoring and evaluation process — nga agserbi kas pagibasaran ni social worker nu mabalin nan nga irekomendar iti korte iti ken agdesisyon dagitoy a pannakawaya dagiti ubbing iti uneg ti bahay pag-asa.
Innayon ni Cabello a nasayaat nu tumulong ti pamilya ken nagannak ken aramiden da iti responsibilidad da kalpasan a nawayaan dagiti ubbing tapno saan dagitoy a magutigot nga agaramid manen iti maikanniwas ti linteg. Kabayatanna, inpakammo ni Cabello nga adda ti dua nga indibidual nga agtawen iti 17 iti agdama nga agnanaed iti bahay pag-asa gapu iti kaso nga adda pakainagan na iti illegal a droga ken iti panagtatakaw.
