LAOAG CITY – Naiget a naglikudan ni Executive Secretary Lucas Bersamin ti alegasyon ni dati a Department of Public Works and Highways Undersecretary Roberto Bernardo iti naiyuswat a panagdengngeg ti Senate Blue Ribbon Committee, mainaig iti maipagarop a “15% commitment” a maipagarop a para iti Office of the Executive Secretary.
Basar iti sinapataan a palawag ni Bernardo iti Senado, nadakamat na nga idi 2024, maipagarop a tinawagan ni Department of Education Undersecretary Trygve Olaivar, para iti maysa a taripnong mainaig iti Unprogrammed Appropriations a maipagarop a para iti Office of the Executive Secretary.
Iti nasao a taripnong ket nakiddaw ti listaan dagiti proyekto.
Mainaig iti daytoy, iti maysa nga statement, inbatad ni Bersamin nga awan ti kinapudno na ti rakurak ni Bernardo gapu ta saan a makibibiang ti Office of the Executive Secretary iti aniaman a saritaan nga adda ti pakainaigan iti budgetary allocations ti Department of Public Works and Highways (DPWH).
Inlawlawag na pay nga awan ti transaksyon wenno koneksyon ti Office of the Executive Secretary ken ni Bernardo, uray ken ni Undersecretary Olaivar, nga immunan a naglibakan na iti isu metlaeng nga alegasyon.
Inpetteng ni Bersamin nga agtaltalinaed a nadalos ti rekord na kas nabayagen nga agserserbi iti gobierno, immuna kas career judicial officer ken iti agdama ket kas Executive Secretary.
