LAOAG CITY – Mangisayangkat ti caucus dagiti Senador inton Lunes tapno mapagsasaritaan ti pannakaayab iti Senate Blue Ribbon Committee kada Cong. Zaldy Co ken dati nga Speaker Martin Romualdez.
Inbatad ni Senador Kiko Pangilinan, kas kortesiya ket plano nga imbitaran da Co ken Romualdez ngem daytoy ket ipinalda pay laeng iti maisayangkat a caucus.
Nupay kasta, gapu iti inter-parliamentary courtesy ket saan a mabalin a puersaen ti dua a kongresista nga agatendar iti panagdengngeg ti Senado.
Kabayatanna, no ni Senador Erwin Tulfo ti masaludsod, kalikagumna nga ikkaten pay laeng ti inter-parliamentary courtesy tapno maimbitaran dagiti kongresista a mairamraman iti maanomalya a flood control projects.
Maipalagip nga immunan nga inrakurak ni Blue Ribbon Committee Chairman Ping Lacson a maikanniwas iti tradision ti inter-parliamentary courtesy ti panangimbitar dagiti agpanpanday linteg manipud iti Kamara.
