LAOAG CITY – Inrakurak ni Department of Economy, Planning and Development (DepDev) Secretary Arsenio Balisacan a maysa kadagiti rason ti kinaadu dagiti ghost ken substandard flood control projects ket ti kinaawan ti monitoring ken evaluation kadagiti proyekto.
Iti panagdengngeg ti budget ti Department of Economy, Planning and Development iti Senado, inbatad ni Balisacan a kalpasan ti termino ni dati a Presidente Noynoy Aquino idi 2015 ket naisardengen ti panangpundo iti monitoring ken evaluation kadagiti proyekto.
Kunana a nakatulong koma iti panagadal tapno masigurado ti kalidad dagiti imprastraktura ken programa.
Inlawlawagna nga agpapan iti daytoy a gundaway ket awan ti ipapaay a suporta para iti panagadal a mangar-aramid ti impact assessment ken monitoring assessment dagiti nalpas ken manarimaan a proyekto rason a maul-ulit laeng dagiti panagbiddot.
Inpetteng pay ni Balisacan a saan met a nangina ti panangisayangkat ti monitoring ken evaluation no sadinno nga adu ti nalalaing nga unibersidad iti intero a pagilian a mabalin a kabinnulig kadagiti research institutions iti panagadal tapno maliklikan ti pannakasayang dagiti programa ken proyekto.
