LAOAG CITY – Nangipeksa ti pannakadismaya ni Davao City Rep. Paolo Duterte kalpasan ti kontrobersial a pannakadutok ken ni Justice Secretary Jesus Crispin “Boying” Remulla kas baro nga Ombudsman.
Ti Ombudsman ket maysa nga independent constitutional office nga addaan ti responsibilidad nga agsukisok ken mangipila ti kaso kontra kadagiti opisial ti gobierno a karaman iti maanomalya.
Gapu iti daytoy, adda dagiti sumagmamano a grupo ti nangipeksa ti panagdanag iti posible a conflict of interest iti panagtugaw ni Remulla a dati a paset ti gabinete ni Presidente Ferdinand Marcos Jr. iti maysa a posision a nasken a nawaya iti impluwensia ti gobierno.
Nadutokan ni Remulla kas baro nga Ombudsman kalpasan ti panagretiro ni Samuel Martires a nagbalin a sentro met kadagiti kontrobersia mainaig iti transparency ken access iti Statement of Assets, Liabilities, and Net Worth (SALN) dagiti opisial.
Iti baet kadagiti pammabalaw, inpetteng ti Malacañang a legal ken maiyannatop iti proseso ti appointment.
Kabayatanna, nagpanawagan ni Rep. Duterte iti publiko nga agbalin a naridam ken ilaban ti integridad dagiti institusion a nasken a mangitantandudo ti accountability iti gobierno.
