LAOAG CITY – Inpasigurado ni Secretary Jesus Crispin Remulla nga agtignay a dagus kadagiti banag nga adda ti pakainagan na iti imbestigasion iti flood control corruption apaman nga agtugaw kas baro nga Ombudsman.
Rakurak daytoy ti outgoing Justice chief kalpasan a nasaludsod kenkuana no ania ti abalin a namnamaen ti publiko manipud kenkuana mainaig iti isyu ti flood control projects kalpasan ti panangdutok kenkuana ni President Ferdinand “Bongbong” Marcos Jr. kas Ombudsman.
Segun kenni Remulla, iti pagalagadan iti Ombusdman ket adda ti fact-finding no sadinno i-validate da amin dagiti datos a maisubmitir kas kadagiti inpila ti Independent Commission for Infrastructure kasta met dagiti ipila ti Department of Justice ket adda ti koneksyon na kadagiti indibidual nga addaan ti Salary Grade 27 agpangato.
Ummunan nga inrekomendar ti independent commission iti posible a pannakapila ti graft, malversation, ken falsification charges kontra kada Ako Bicol Rep. Zaldy Co ken dadduma nga opisyal ti Department of Public Works and Highways (DPWH) mainaig iti P289.5- million road dike project iti Mag-Asawang Tubig River idiay Naujan, Oriental Mindoro.
Im-imbestigaren pay ti Ombudsman ni Commission on Audit Commissioner Mario Lipana gapo iti maipagarop a pannakainaig na iti anomalya a flood control projects.
Kuna ni Remulla a namnamaen ti kaadoan nga alisto ti garaw daytoy ken iyalisto da pay ti proseso nangruna ket saanen a limed daytoy iti kaadoan.
Maipalagip a nadutukan ni Remulla kas baro nga Ombudsman, maysa nga aldaw kalpasan a ti shortlist para iti posisyon ket inparuk-at ti Judicial and Bar Council.
Sukatan na ni dati a Ombudsman Samuel Martires a naglippas ti termino na idi July 27 ke ni Remulla ket addaan ti fixed term iti pito a tawen nga awanan ti reappointment.
