LAOAG CITY – Balligi ti panagreport ni Governor Cecilia Araneta-Marcos kadagiti nagapwanan na iti uneg ti 100 nga aldaw a panagtugaw na kas mangidaulo ditoy probinsya.
Inaramid na daytoy iti Imelda Culture Center iti ciudad ti Batac iti oras ti alas-singko itay malem, Oktubre 10, 2025.
Nagatendar met dagiti opisyales iti nagduduma nga ili ken ti dua a ciudad ditoy probinsya, nagduduma a sektor, organisasyon, ken dadduma pay.
Inbatad ti gobernador a ti panagdur-as ti maysa a lugar ket marukud babaen ti kaado dagiti biag a nasagid ken dagiti oportunidad a naparnuay.
Kuna nga nga iti kada umuna a martes ti bolan ket makitarinong kadagiti department heads iti kapitolyo probinsyal, karaman dagiti kameng ti Sang panlalawigan tapno ag-reflect kadagiti sasao ti Diyos kabayatan ti breakfast.
Inrakurak na a kanayun ti panangpalagip na kadagiti board members nga aniaman ti idaulwan da a komite ket masapol ti naiget a koordinasyon da kadagiti department heads a konektado iti sektor da.
Naiget pay ti pannakitrabaho ti gobernador iti Human Resource Management Office tapno masigurado ti patas ket umiso a panawen ti promosyon kadagiti dedicated nga empleado iti gobierno probinsyal kas panangbigbig iti kinagaget da ken panangipaay kadakuada ti motibasyon tapno itultuloy da ti napintas a serbisyo da.
Inpanakkel pay ti gobernador ti naan-anayen a pannakaaprubar ti pannakaikkat ti Salary Grade 1 ken 2 tapno masigurado ti pagsayaatan dagiti empleado babaen ti pannakaipangato iti Salary grade 3.
Kabayatan pay dagiti ummuna a bolan a panagtugar ni Governor Araneta-Marcos ket napadur-as ti kooperasyon dagiti departments ken officials iti panangtutuk ti pagimbagan dagiti empleado ken ti responsive governance para kadagiti residente ditoy Ilocos Norte.
Saan met a nagpaudi ni Governor Marcos iti panangipaay ti tulong kadagiti residente a naapektaran kaadagiti kalamidad iti kallabes.
Iti pay paset ti panagbitla ti gobernador ket nadakamat na ti pannakakumpleton ti 1st phase ti baro a Provincial Health office building idinto a ti 2nd Phase ket manarimaan ti pannakaaramid na.
Inbida na pay ti panangpadayaw ti Department of Health ti Ilocos Norte ti “Kampeon ng Kalusugan sa mga Komunidad- Healthy Communities”, ken ti pannakagun-od ti probinsya ti umuna a ranking no maipapan ti fully immunized kontra iti Human Papilloma Virus no sadinno nga agingga idi Agosto ita a tawen ket 56.85% dagiti ubbing a nabakunaan idinto a ti implementasyon ti Universal Health Care Program ket 100 a porsiento para iti preparatory activities, 97.2% par iti organizational readiness ken 57.9% para iti functional operations.
Umabot met ti P2.29 milyon a balor dagiti agas ti naibunong manipod Hulyo agingga ti Setyembre ita a tawen tapno masigurado ti accessible health services.
Saan met a nalipatan ni gobernador Marcos ti mangpapigsa ti commitment na para kadagiti mannalon ken mangngalap babaen ti panangipaay kadakuada ti tulong pinansyal, modern technologies, ken enterprise support tapno masigurado ti productive, sustainable, ken resilient agricultural sector.
Agarop P62-milyon ti naibunong iti 21 a farm organization a nakabenepisyaran ti nasurok nga 6 a ribo a mannalon ken fisherfolks babaen ti “Agri Ka Dito Program”.
Sabali pay ti 8 a milyon a Sustainable Agroforestry Farm Enterprise – Bamboo Business Model Project, ken intono 2026 ket inkari ni Governor Marcos a ti agrikultura ti makaawat ti kadakkelan a budget.
Inpasigurado pay ni Governor Marcos nga itultuloy na ti mangpatibker ti environmental initiatives babaen ti panangitandudo ti eco-friendly practices ken climate resilience, mangprotehir ti natural resources kabayatan ti pananggutigot na ti sustainable lifestyles dagiti Ilokanos.
Mainaig iti daytoy, inreport pay ti gobernador ti pannakabigbig ti Public Employment Service Office ti Ilocos Norte kas “Best PESO” babaen ti Department of Labor and Employment Region I iti nagsasaruno a tallo a tawenen.
Mainaig iti daytoy, inkari ti gobernor nga itultuloy ti gobierno probinsyal ti suporta na para iti pannakapalawa ti market access ken mapatalged ti local enterprises babaen ti panangsuporta na kadagiti trade fairs, marketing initiatives, ken dagiti collaborative programs.
