LAOAG CITY – Ginutigot ni Solid North Partylist Rep. Ching Bernos ti liderato ti kamara ken dagiti padana a kongresista nga ipasa ti House Bill No. 3116 wenno ti gakat a Magna Carta for Private School Teachers.
Inbatadna a daytoy ket kas sungbat ti gakatna iti sakripisio dagiti private school teachers iti baet ti kinaawan ti financial security ken panagdur-as ti career-da.
Nakaipalaon iti gakat ni Congresswoman Bernos ti panangikeddeng iti innem nga oras a panagtrabaho dagiti mangisursuro iti kada aldaw wenno saan a lumabes iti walo nga oras ken panangipaay kadakuada ti hardship allowances.
Mamati ni Bernos a sungbat daytoy a gakatna iti exodus wenno panagtalaw dagiti mangisursuro iti pribado a sektor gapu ta saan nga umdas ti sueldo dagitoy, kurang kadagiti benepisio ken proteksion.
