LAOAG CITY -Maysa kadagiti prayoridad ti City Tourism Office ket ti pannakapadur-as ti industriya ti kawayan ditoy ciudad ti Laoag.
Daytoy ti inbatad ni Atty. Charito Malicad, ti mangidadaulo iti City tourism office ditoy ciudad.
Segun kenni Atty. Malicad, kalikagom da nga ad-adda pay a mapadur-as dagiti produkto a maar-aramid babaen iti kawayan tapno umado pay dagiti tattao a mangsuporta kadagitoy a mabalin pay a maiyam-ammo iti nagduduma a lugar.
Kunana a planwen da a nasayaat no ania pay dagiti mabalin a wagas tapno matulungan a mapdur-as ti nasao nga industriya gapu ta makitana a napintas a pagsapulan daytoy dagiti residente ditoy ciudad.
Inpasigurado ni Malicad a mangipatungpal dan to pay ti panagsanay dagiti bamboo weavers tapno ad-ado dagiti napipintas a maaramid wenno mapartuat da a produkto manipud iti kawayan kas iti bag, kallugong, basket ken dadduma pay.
