LAOAG CITY – Agbibinnulig ti Technical Education and Skills Development Authority, Department of Science and Technology, ken Department of Trade and Industry tapno mangipaay ti pagbiagan ken panggedan kadagiti kaprobinsiaan.
Inlawlawag ni Dr. Soccorro Galanto, provincial director ti TESDA, inter-agency coordination ti maysa kadagiti solusyon tapno ad-adda pay a maitandudo ti lokal a produkto ken makaipaay ti panggedan babaen kadagiti nagduduma a programa da.
Segun ken Galanto, kangrunaan a magungundawayan a kurso nga ididiaya da ket pakaseknan ti agri-entrepreneur kas iti crop production paritkular ti agro-entrep course ken agri-entrep course, agricultural crop production NCII, ken dadduma pay.
Kalpasan iti panagsanay da ket mairefer da iti Department of Science and Technology para iti innovation ti crop products dagitoy.
Manaig iti daytoy, no addan dagiti maaramid a lokal a produkto manipod kadagiti root crops ket iyasideg dan to iti Department of Trade and Industry para iti packaging, labeling, ken marketing dagitoy.
Innayon ni Galanto a sindadaan ti ahensia da tapno makapataud pay ti ad-ado a negosyante wenno entrepreneur ditoy probinsia babaen kadagiti kurso nga ididiaya da.
