LAOAG CITY – Inbatad ni Barangay Chairman Pete Duldulao iti Barangay 21 iti ili ti San Nicolas nga addan ti pannakaireklamo ti maysa kadagiti biktima ti pammaltog a ni Eloisa Jane Pagadoan Bonilla iti barangay da iti kallabes.
Kuna na a ti mismo a nagreklamo ket ti asawa ti pulis a suspek iti napasamak a pammaltog gapu iti maipagarop a love triangle.
Inlawlawag ti kapitan a basar iti impormasyon na ket datin nga agam-ammo gapu ta agkaadalan ni Bonilla ken ti suspek, ken mabalin nga iti panagkita da ket nariing manen ti rikna da iti tunggal maysa isut gapuna a nagreklamo iti barangay da ti asawa ti nasao a pulis.
Innayon na nga uray ti relasyon ni Bonilla ken ni Barangay Barangay Kagawad Joshua Madamba ket saanna a sigurado ti pudno nga estado na gapu ta idi dinamag na ket insungbat da nga agbarkada da laeng.
