LAOAG CITY – Nangbukel ni DPWH Secretary Vince Dizon iti Technical Working Group (TWG) a mangkita kadagiti amin a flood control projects sakbay a mapondoan ken maipatungpal dagitoy inton tawen 2027.
Karaman iti grupo da DENR Undersecretary Carlos Primo David, flood control expert Guillermo Tabios III, ken ni Project NOAH Executive Director Mahar Lagmay.
Panggep ti Technical Working Group a malapdan dagiti proyekto nga awan ti umno a plano ti inhenieria, nga ibilang ni Dizon a maysa kadagiti rason ti agtultuloy a panaglayus ti pagilian.
Inbilin ni Presidente Ferdinand Marcos Jr. ti pannakasuspenso ti amin a lokal a flood control projects intono tawen 2026 kabayatan a daldalusan ti ahensya dagiti isyu ti kurapsion ken inefficiency.
Tumulong pay ti Technical Working Group a mangbukel iti 2027 budget plan ti DPWH ken mangilasin kadagiti estruktura a rumbeng a marebba no daytoy ti mangkaro iti layos.
