LAOAG CITY – Im-imbestigaran ti Department of the Interior and Local Government (DILG) dagiti sumagmamano a Mayor ken lokal nga opisial idiay Cebu a nagbiahe a nagturong idiay Europa kabayatan iti iduduprak ti Bagyo Tino iti probinsia a nangitunda ti nakaro a pannakadadael ken nakatayan ti sumurok maysa a gasut nga indibidual.
Inbatad ni Assistant Provincial Administrator Aldwen Empaces, inbilin ti Department of the Interior and Local Government Central Office ti Kapitolio ti Cebu a mangisubmitir kadagiti travel order ken maiyannatop a dokumento tapno maammoan no adda ti legal a pangibasaran dagiti biahe dagiti nasao nga opisial.
Karaman kadagiti naikkan ni Gov. Pamela Baricuatro ti Foreign Travel Authority (FTA) ti pito a Mayor kadagiti nagduduma nga ili idiay Cebu pakairamanan ni Provincial Board Member Andrei Duterte.
Inlawlawag ni Gobernadora Baricuatro a dagiti travel authority ket napirmaan sakbay pay a dimmuprak ti bagyo ken dadduma pay a kalamidad iti rehion.
Kabayatanna, ni Tourism Secretary Christina Garcia Frasco ket adda idiay London idi Nobiembre 4 kas mangidaulo ti delegasion ti Pilipinas iti World Travel Market.
Nupay kasta, apaman a nadamagna ti didigra ket insigida a nagawid ditoy pagilian kaduana ti asawana a ni 5th District Representative Duke Frasco tapno idauluan ti relief operations idiay Cebu.
