LAOAG CITY – Natay ti maysa nga indibidual ken nadadael ti 170 a pasdek kalpasan iti napasamak a kadakkelan nga uram idiay Japan iti agarup 50 a tawen.
Nagtitinnulong dagiti military ken firefighting helicopter tapno masebseban ti dakkel nga apoy iti abagatan a paset ti Japanese coastal city.
Naipakita ti aerial footage dagiti nadadael a pagtaengan ken napuskol nga asok a ngumatngato manipud iti distrito ti Saganoseki iti siudad ti Oita a pakasarakan ti maysa a fishing harbor a nalatak iti premium daytoy a Seki-brand mackerel.
Nagramram ti apoy kadagiti asidegna a kabanbantayan gapu iti napigsa a pul-oy ti angin.
Basar iti Fire and Disaster Management Agency ti Japan, nauram ti 48,900 square meters wenno katukad ti sumurok-kumurang pito a soccer field ti kalawana no sadinno nga adda ti 175 a residente ti insigida a naibakwit.
Mainaig iti daytoy, maysa a tao ti nabirukan a natay idinto a maysa a babai nga agtawen ti 50 ti naipadamag a naospital gapu iti pannakauramna.
Napukawan ti suplay ti kuriente ti sumurok-kumurang 300 a pagtaengan basar iti Kyushu Electric Power.
Maipalagip nga idi 2016, maysa nga uram iti Itoigawa ti nangitunda ti pannakadadael ti 147 a pasdek ken addaan ti kalawa a 40,000 square meters ken awan ti naimaldit a pimmusay.
Iti agdama, agtultuloy ti maiwaywayat nga imbestigasion dagiti otoridad iti namunganayan iti maibilang a kadakkelan nga uram idiay Japan kalpasan ti agarup 50 a tawen.
