LAOAG CITY – Inpakammo ni Ombudsman Jesus Crispin “Boying” Remulla a maipila ti kaso kriminal kontra kadagiti contractor couple a Sarah ken Curlee Discaya iti Sandiganbayan.
Segun kenni Remulla, mabalin a maipila daytoy intono bigat wenno iti nasapa a paset iti sumaruno a lawas.
Inbatad na a nalpasen ti preliminary investigation ken daytoy ket submitted for resolution iti tallo a kaso.
Ti rakurak ni Remulla ket kalpasan met a nagpila ti Office of the Ombudsman ti malversation and graft case kontra kenni dati a congressman Elizaldy Co, Sunwest Corp.’s Board of Directors, ken sumagmamano nga opisyal ti DPWH Region IV-B nga adda ti pakainaigan na iti substandard flood control project idiay Naujan, Oriental Mindoro.
Malaksid iti daytoy, kuna ni Remulla a dagiti Senador a nairaman ti nagan na ket mapatulodan ti subpoena iti kabiitan a panawen.
Ummuna iti daytoy, nagpila ti Department of Public Works and Highways (DPWH) ti kaso kontra kadagiti Discayas iti Office of the Ombudsman gapo iti maipagarop a pannakairaman da iti flood control projects issue iti Bulacan.
