LAOAG CITY – Binigbig ni Presidente Ferdinand R. Marcos Jr. ti napapateg a kontribusyon dagiti overseas Filipino workers (OFWs) iti panagdur-as ti pagilian, ken inpasigurado na ti agtultuloy a suporta ti administrasyon na tapno mapalag-an ti panagbiag da ken papigsaen dagiti programa a mangital-o iti pagsayaatan da.
Iti naiwayat a seremonya ti 2025 Bagong Bayani Awards iti Ceremonial Hall iti Palasyo ti Malakanyang, indanun ni Presidente Marcos ti panagyaman na kadagiti migrante a mangmangged iti panangipakita da ti pudno a panagsisinnakit ken kinagaget dagiti Pilipino iti nagduduma a paset ti lubong, nga isu met ti daydayawen ti international community.
Inpasigurado ni Presidente Marcos nga agtultuloy ti sibubukel a suporta ti gobierno kadagiti Overseas Filipino Worker.
Ti Bagong Bayani Awards ket naestablisar idi 1983 iti babaen ti Letter of Instruction No. 1320 nga inparuk-at ni dati a Presidente Ferdinand E. Marcos Sr., kas panangbigbig kadagiti Overseas Filipino Worker a mangipakpakita ti propesyonalismo, kinalaing ken dedikasyon iti trabaho da.
Binigbig pay ni Presidente Marcos dagiti sakripisyo dagiti Overseas Filipino Worker para iti pamilya da ken nagkari ti agtultuloy a suporta ti gobierno tapno mapasayaat ti panagbiag da.
Karaman kadagiti agdama nga inisyatibo ti gobyerno para kadagiti Overseas Filipino Workers ket ti digitalization ti proseso ti overseas employment kas ti OFW Travel Pass iti eGovPH App ken Online Employment Contract Verification System; panagisyu ti sumuruk-kumurang a 300,000 electronic cards manipod kadagiti Overseas Workers Welfare Administration (OWWA) para iti al-alisto a pannaka-access dagiti serbisyo ken benepisyo ti gobyerno, ken ti pannakapasayaat ti serbisyo ti salun-at iti babaen ti OFW Hospital ken OWWA Botika.
Kabayatanna, iti babaen ti AKSYON Fund, mangipapaay dagiti opisina ti Department of Migrant Workers ti legal, medikal, ken pinansyal a tulong kadagiti Overseas Filipino Workers.
Bwinangay ti gobierno ti OFW Lounge iti Ninoy Aquino International Airport (NAIA) tapno siguradwen ti nalaglag-an a panagbiyahe dagiti Overseas Filipino Workers.
Naamoan a dagiti awardee ti Bagong Bayani Award ita a tawen ket da Engr. Romaline Dizon Isla kas Outstanding Employee; Eva Rasgo Mapa para iti Community and Social Service; Michael Palic Conjusta para iti Culture and the Arts; Capt. Rolly Tenorio Lapinig ken ti 18 a Filipino Crew ti MV MSC Aube F para iti Heroic Act; ken ni Camille Figueras Jesalva-Junio para iti the Susan “Toots” V. Ople Award.
Para iti Bagong Bayani Award for Successful Reintegration, dagiti awardee ket isuda Elaine Vianca G. Figueroa, Ruellyn S. Ribon, at Alexander Inday Sebastian.
Kamaudianan na, ni Capt. Gaudencio C. Morales ket awardee ti Bagong Bayani Award for Successful Reintegration ken Capt. Gregorio S Oca Achievement Award.
