LAOAG CITY – Nagballaag ti Department of Social Welfare and Development (DSWD) kadagiti amin a barangay officials a mapaneknekan a karaman iti panangkissay ti cash aid dagiti benepisiario ti Assistance to Individuals in Crisis Situation (AICS) a mapagsungbat dagitoy iti linteg.
Daytoy ket kalpasan ti insidente iti panangkissay ti cash aid dagiti benepisiario idiay Iloilo.
Rumrummuar iti imbestigasion ti special fact-finding team ti Department of Social Welfare and Development a 27 a benepisiario ti Assistance to Individuals in Crisis Situation ti nakaawat laeng ti sag-P2,000 a nasken koma a P10,000 nga ayuda gapu ta maipagarup nga P8,000 ti innala dagiti barangay officials.
Inbatad ni Asst. Secretary for Regional Operations Paul Ledesma, mangidadaulo ti fact-finding team, saan nga isolated daytoy a kaso gapu ta adda dagiti reklamo met ti panangkissay ti ayuda kadagiti sumagmamano a lugar idiay Capiz ken kaparanget a probinsia.
Naammoan nga addan ti nai-report a 13 nga opisial manipud iti siam a barangay ti naireklamo iti panangkissay ti ayuda.
Mabutbuteng dagiti sumagmamano a benepisiario nga agipulong gapu ta pangpangtaan isuda dagiti barangay official.
Gapu iti daytoy, ginutigot ti Department of Social Welfare and Development dagiti amin a naapektaran a benepisiario nga umasideg ken ag-report kadakuada mainaig iti nasao a kaso.
