LAOAG CITY – Namnamaen ti legal team ni dati a Presidente Rodrigo Duterte ti report ti panel ti medical experts a nang-eksamin kenkuana no kabaelan na ti agatendar iti panagdengeg iti International Criminal Court (ICC) ita a lawas.
Segun kenni legal counsel Nicholas Kaufman, ti report ti International Criminal Court (ICC)-accredited expert panel iti kondisyon ni Duterte ket posible a maiparuk-at intono December 5.
Inbatad na nga agingga a saan da a maawat ti report ket saan da nga agkomento mainaig iti posible a laonen ti resulta gapo ta adda ti manarimaan a litigation.
Nupay kasta, mangnamnama daytoy a ti evaluation dagiti medical experts ket mangipaneknek nga usto da iti insubmitir da iti kallabes nangruna ket ti agtrabtrabaho da iti inaldaw kadua ni Duterte ken marigatan da gapo iti sagsagabaen ti dati a presidente.
Mainaig iti daytoy, kuna ni Kaufman nga agisubmitir da met ti sungbat da iti findings ti medical experts’ panel sakbay wenno intono December 12.
Kuna na a nadismaya ni Duterte ngem saan met unay a nakigtot idi naamoan na ti panangibasura ti ICC Appeals Chamber ti apela da para iti interim release.
Inbatad ni Kaufman nga inpakammo na kenni Duterte ti desisyon idi met laeng Nobyembre 28 ken inbaga na met ti daytoy nga iti pakasaritaan ti ICC, ket awan pay ti napatgan a temporaryo a nawayaan kadagiti suspek a sumangsango iti crimes against humanity.
