LAOAG CITY – Ninayunan ti Senado ti pondo para iti School-based Feeding Program ti Department of Education (DepEd) ken ti Supplementary Feeding Program ti Department of Social Welfare and Development.
Segun ken ni Senador Win Gatchalian, iti babaen ti Senate committee report iti nailungalong a 2026 national budget, nanayunan pay ti P15.06 bilyon ti P13.61 bilyon a nailatang iti babaen ti General Appropriations (GAB) Bill (House Bill No. 4058).
Iti babaen ti P28.67 bilyon a pondo, maipatungpal ti Department of Education ti feeding program iti uneg ti 200 nga aldaw wenno katukad ti maysa a sibubukel nga school year.
Manamnama pay ti 4.8 milyon nga agad-adal a mairanud iti nasao a programa.
Sakopen ti programa dagiti amin nga agad-adal iti Kindergarten ken Grade 1.
Agtultuloy ti suporta ti programa kadagiti ‘wasted’ ken ‘severely wasted learners’ manipod Grade 2 agingga iti Grade 6.
Makaawat met ti Supplementary Feeding Program ti nayun a P3.3 bilyon malaksid iti P3.32 bilyon a nailatang iti babaen ti General Appropriations Bill.
Maipalawa ti nasao a pondo ti bilang ti feeding days ti programa manipod 120 agingga iti 180.
Nasurok a 1.8 milyon nga ubbing nga awan pay ti lima ti tawen na a nakaenroll kadagiti Child Development Centers (CDCs) ti manamnama a mairanud iti nasao a programa.
