LAOAG CITY – Naikeddeng a mangipila ti kaso ti Office of the Ombudsman kontra kadagiti walo nga opisial ti Department of Public Works and Highways idiay Davao Occidental ken contractors a karaman iti P96.4 million ghost infrastracture iti nasao a probinsia.
Maipila dagiti kaso iti Regional Trial Court of Digos City kontra kada District Engineer Rodrigo C. Larete, Assistant District Engineer Michael P. Awa, sumagmamano a Section Chiefs, Project Engineers ken Inspectors ti Department of Public Works and Highways Davao Occidental District Engineering Office.
Karaman pay kadagiti pilaan ti kaso dagiti pribado nga indibidual nga isuda Ma. Roma Angeline Rimando ken Cezarah Rowena Discaya ti St. Timothy Construction Corporation.
Naammoan a karaman kadagiti kaso nga ipila kontra kadagiti opisial ti Malversation of Public Funds through Falsification of Public Documents ken panaglabsing iti Anti-Graft and Corrupt Practices Act.
Namunganay ti reklamo iti maipagarup a panagkunsabo dagiti respondents tapno mapaalisto ti ₱96,500,000 a pundo iti konstruksion ti proyekyo idiay Barangay Culaman, Jose Abad Santos, Davao Occidental.
Sinuspenso payen ti Ombudsman iti uneg ti 60 nga aldaw dagiti opisial ti Department of Public Works and Highways Davao Occidental a karaman iti maanomalya a proyekto.
