LAOAG CITY – Binabalaw ti kampo ti negosiante a ni Atong Ang ti desision ti Department of Justice (DoJ) a makasoan iti kidnapping ken homicide gapu iti pannakairamanda iti pannakapukaw dagiti mammallot.
Inbatad ni Atty. Gabriel L. Villareal, abogado ti negosiante, saan a patas ti nasao a resolusion kadagiti akusado ken nakatutok iti mapagduduaan a testimonya ti testigo a ni Julie Patidongan.
Inakusaran pay ni Villareal ni Patidongan a nangmanipular iti proseso tapno maisalakan ti bagina.
Kukwestyunaran da pay ti panangilaksid ti Department of Justice kadagiti kangrunaan a nairaman iti nasao a kaso.
Kiniddawda iti Philippine National Police-Criminal Detection and Investigation Group (PNP-CIDG) nga imbestigaran manen ti kaso.
Maipalagip a pakpakasoan ti Department of Justice ni Ang ken 21 a sabsabali pay iti kaso a kidnapping ken homicide gapu iti pannakapukaw dagiti mammallot.
