LAOAG CITY – Inpetteng ni Senate President Tito Sotto III a saan laeng a nasken nga agsardeng iti panangipila ti kaso iti contractor a ni Sarah Discaya mainaig iti maanomalya a flood control projects.
Inbatad ni Sotto a nasken nga agsungbat dagiti amin a nagbasol kadagiti umili nangruna kadagiti nakaawat ti dadakkel a pundo ken dagiti nangangato nga opisial nga adda iti likudan ti maanomalya.
Mamati ti Senate President a saan met nga agbalin a dakkel ti cut wenno naala iti proyekto no saan a nangato nga opisial ti adda iti likudan iti daytoy.
Mamati ni Sotto nga adun kadagiti umili ti maganatan nga adda dagiti taga-gobierno ti maibalud gapu iti daytoy a maanomalya nangruna ket immuna a naikari a Disiembre 15 ket addan ti maibalud gapu iti maanomalya a flood control projects.
Nupay kasta, maawatanna no apay a maibaybayag ti pannakaipila ti kaso ken pannakaibalud kadagiti karaman iti anomalya.
Innayonna a daytoy ket kas panagan-annad dagiti imbestigador iti panang-validate dagiti impormasion tapno saan nga agtennag iti pannaka-dismiss dagiti kaso.
