LAOAG CITY – Inbatad ni Mr. Mohammad Rampatan, maysa kadagiti aglaklako ti torotot ditoy ciudad ti Laoag a bassit pay ti naglakoan da no ikompara iti napalabas a tawen nga adon ti naglakoan da iti bisperas ti paskua.
Daytoy ket iti baet a bimmaba ti presyo ti torotot gapu ta manipod iti 35 a pisos ket nagbalinen a 30 a pisos.
Patien na a ti kangrunaan a rason no apay a bassit ti malakoan da ket gapu ta immado dan nga aglaklako ti torotot ditoy ciudad ti Laoag.
Kuna na a kadagiti naglabas a tawen ket tallo da laeng nga agpwespwesto iti lugar ngem ita ket nakaad-ado dan nga aglaklako ti torotot.
Innayon na a possible nga ad-ado dagiti saanda a malako ita a tawen.
