LAOAG CITY – Naarestar ti maysa a lalaki kalpasan a naalaan ti paltog ken maipagarup a shabu ita nga aldaw mismo ti paskua, Disiembre 25 iti Barangay 16 ditoy siudad ti Laoag.
Nabigbig ti suspek a ni Jeffrey Culcol, agtawen ti 37 ken residente ti Barangay 17 ditoy siudad ti Laoag.
Basar iti Laoag City Police Station, adda ti naawatda a report manipud kadagiti concerned citizens a maipagarup nga adda ti ikot a paltog ti suspek.
Gapu iti daytoy, insigida a nangiwayat ti operasion dagiti otoridad ket ditoy a natiliw ti suspek kabayatan ti panagay-ayamna ti chess iti maysa a pagbilyaran.
Nakumpiskar dagiti otoridad kabayatan ti panagkapkapda iti suspek ti maysa a calibre 38 a paltog nga addaan ti uppat a bala ken uppat nga heat sealed transparent plastic sachet a naglaon ti maatap a shabu a naikabil iti bassit a pitaka.
Mainaig iti daytoy, rumrummuar nga us-usaren ti suspek a ti paltogna a pangbutbuteng kadagiti karrubana banag a pagam-amkan dagiti residente.
Naammoan a natiliw ti suspek gapu iti naiwayat nga Anti-Illegal Drug Buy-bust Operation idi 2017 no sadinno a karuruarna laeng iti New Bilibid Prison idi Hunio 2025.
Kabayatanna, inpakaammo ni Mr. Cirilo Leal, akinkukua ti pagbilyaran iti Barangay 16 ditoy siudad ti Laoag a naimatanganna nga adda ti ikot a paltog ti suspek ken naala dagiti otoridad dagiti maipagarup a shabu iti mismo a bulsa ti suspek.
